மார்ச் 29

✠ புனிதர் லூடோவிகோ ✠(St. Ludovico of Casoria)

✠ புனிதர் லூடோவிகோ ✠(St. Ludovico of Casoria)

குரு, நிறுவனர் :
(Priest, Founder)

பிறப்பு : மார்ச் 11, 1814
நேப்பிள்ஸ், இத்தாலி அரசு
(Naples, Kingdom of Italy)

இறப்பு : மார்ச் 30, 1885 (வயது 71)
நேப்பிள்ஸ், இத்தாலி அரசு
(Naples, Kingdom of Italy)

ஏற்கும் சமயம் :
ரோமன் கத்தோலிக்க திருச்சபை
(Roman Catholic Church)

அருளாளர் பட்டம் : ஏப்ரல் 18, 1993
திருத்தந்தை இரண்டாம் ஜான் பால்
(Pope John Paul II)

புனிதர் பட்டம் : நவம்பர் 23, 2014
திருத்தந்தை ஃபிரான்சிஸ்
(Pope Francis)

பாதுகாவல் : கசோரியா (Casoria)

நினைவுத் திருநாள் : மார்ச் 30

புனித லூடோவிகோ இத்தாலிய ஃபிரான்சிஸ்கன் (Italian Franciscan) துறவி ஆவார். அதிசிறந்த சமூக சீர்திருத்தவாதியான இவர், "சாம்பல் நிற துறவியர் கருணை இல்லம்" (Grey Friars of Charity) மற்றும் "புனிதர் எலிசபெத்தின் சாம்பல்நிற அருட்சகோதரிகள்" (Grey Sisters of Saint Elizabeth) ஆகிய இரண்டு சபைகளை தோற்றுவித்தார்.

"அர்ச்சாஞ்செலோ பல்மென்ட்டியேரி" (Arcangelo Palmentieri) எனும் இயற்பெயர் கொண்ட இவர், தச்சுப் பணியில் பயிற்சி பெற்றவர் ஆவார். 1832ம் ஆண்டு, ஜூலை மாதம், முதல் தேதியன்று, "லூடோவிகோ" என்ற ஆன்மீக பெயரை ஏற்றவாறு "ஃபிரான்சிஸ்கன்" இளம் துறவிகள் மடத்தில் இணைந்தார். ஐந்து வருடங்களின் பின்னர் குருத்துவ அருட்பொழிவு பெற்ற சிறிது காலத்திலேயே இவர் 'நேப்பிள்ஸ்' நகரிலுள்ள புனித பேதுருவின் 'ஃபிரான்சிஸ்கன்' துறவு மடத்தின் இளம் துறவிகளுக்கு கணிதம், வேதியியல் மற்றும் தத்துவ இயல் கற்பிக்க நியமிக்கப்பட்டார்.

1847ம் ஆண்டு, இவர் கொண்ட ஒரு இறை அனுபவம், இவரை வாழ்நாள் முழுதும் ஏழைகளுக்கும் தேவையிலிருப்பவர்களுக்காகவும் சேவை செய்வதில் தம்மை அர்ப்பணித்துக்கொண்டதாக கூறப்படுகின்றது. இவர், மருந்தகங்களையும் அநாதை இல்லங்களையும் உருவாக்குவதில் விரைந்து செயல்பட்டார். 1852ம் ஆண்டு, அடிமைத்தளையிலிருந்து மீட்கப்பட்ட ஆபிரிக்க இளம் சிறுவர் சிறுமிகளுக்காக பள்ளிக்கூடம் ஒன்றினையும் நிறுவினார்.

இவர் ஏழைகளையும், வயது முதிர்ந்தோரையும், நோயாளிகளையும், தன் இதயத்தில் தாங்கி பராமரித்தார். எண்ணிலடங்கா மருத்துவமனைகளையும், வயோதிகர் இல்லங்களையும், சாகும் தருவாயில் உள்ளவர்களுக்கென இல்லங்களையும், பள்ளிக்கூடங்களையும் கட்டினார். காதுகேளாதோர் மற்றும் பேசும் திறன் இல்லாதோருக்கும் பள்ளிகளை நிறுவினார். அவர்களை பராமரிப்பதற்கென இல்லங்களையும் கட்டினார். அவரது பிராந்தியத்தின் துறவியர்க்கு உதவும் வகையில் மருத்துவமனை மட்டுமல்லாது, "நேப்பிள்ஸ்" (Naples), ஃப்ளோரன்ஸ்" (Florence) மற்றும் "அஸிஸி" (Assisi) ஆகிய இடங்களில் தொண்டு நிறுவனங்களை நிறுவினார்.

1859ம் ஆண்டு, இவர் ஆண்களுக்கான ஃபிரான்சிஸ்கன் மூன்றாம் சபை ஒழுங்குகளைக் கடைப்பிடிக்கும் சபை ஒன்றினை துவக்கினார். அது, "சாம்பல் நிற துறவியர் கருணை இல்லம்" (Grey Friars of Charity) என்று அறியப்பட்டது. மூன்று வருடங்களின் பிறகு, பெண்களுக்கான துறவு மடம் ஒன்றினையும் துவக்கினார். அது, "புனிதர் எலிசபெத்தின் ஃபிரான்சிஸ்கன் அருட்சகோதரிகள்" (Franciscan Sisters of Saint Elizabeth) எனும் பெயரில் அறியப்பட்டது.

ஆண் துறவியர் சபையின் பணிகள் ஐக்கிய அமெரிக்க நாடுகளிலும் (United States) பரவின. அங்கே அவர்கள், "நியு ஜெர்சியில்" (New Jersey) "இத்தாலிய - அமெரிக்க சமூகத்தினருக்கு (Italian American community) சேவையாற்றினார். தற்போது, அச்சபையின் துறவியர் எண்ணிக்கை மிகவும் குறைவாக இருந்ததால், திருத்தந்தையகம் அந்த சபையை 1971ம் ஆண்டு கலைத்தது.

"புனிதர் எலிசபெத்தின் ஃபிரான்சிஸ்கன் அருட்சகோதரிகள்" (Franciscan Sisters of Saint Elizabeth) சபை, தற்போதும் ஐக்கிய அமெரிக்க நாடுகள் (United States of America), எத்தியோப்பியா (Ethiopia), இந்தியா (India), பனாமா (Panama) மற்றும் ஃபிலிப்பைன்ஸ் (Philippines) ஆகிய நாடுகளில் சேவை புரிகின்றது.

1876ம் ஆண்டு, தீராத பெரும் நோயொன்றால் பாதிக்கப்பட்ட லூடோவிகோ, ஒன்பது வருடங்களின் பின்னர், 1885ம் ஆண்டு, மார்ச் மாதம், 30ம் நாளன்று, தமது 71 வயதில் மரித்தார்.

மார்ச் 29

✠தூய ரூபெர்ட்✠ (மார்ச் 29)

✠தூய ரூபெர்ட்✠ (Rupert of Salzburg)

“அறிவுத்திறன் கொண்டோருக்கு நற்பயிற்சி பொன் நகையாகும்; வலக்கையில் அணிந்த கைவளையாகும்” (சீரா 21:21)

வாழ்க்கை வரலாறு

ரூபெர்ட் ஆஸ்டிரியா நாட்டில் சால்ஸ்பர்க் எனும் ஊரில் 660ஆம் ஆண்டில் பிறந்தார். இவர் அறிவில் சிறந்தவர், தவ முயற்சிகளில் தலைசிறந்தவர், கொடுப்பதில் வல்லவர் என்பதாகும்.

ரூபெர்ட் குணமளிக்கும் வல்லமையைப் பெற்றிருந்தார். அதனால் நிறையப் பேர் இவரிடத்தில் வந்து குணம்பெற்றுச் சென்றார்கள். இவரிடத்தில் இருந்த அறிவுத் திறன், ஆளுமைத் திறன் எல்லாவற்றையும் பார்த்துவிட்டு இவரை வோர்ம்ஸ் நகர ஆயராக ஏற்படுத்தினார்கள். ஆயராக உயர்ந்த பின்பு ரூபெர்ட் அற்புதமான பணிகளைச் செய்தார். குறிப்பாக நற்செய்தி அறிவிப்புக்கு அதிகமான முக்கியத்துவம் கொடுத்து வந்தார். சில காலம் வோர்ம்ஸ் நகர ஆயராக இருந்துவிட்டு, பவேரியாவுக்கு நற்செய்தி அறிவிக்கச் சென்றார். பவேரியாவில் இவர் ஆற்றிய நற்செய்திப் பணிக்கு மிகுந்த பலன் கிடைத்தது. அங்கு மன்னனாக இருந்தவர் ரூபெர்டின் போதனையால் தொடப்பட்டு மனமாறி கிறிஸ்துவை ஏற்றுக்கொண்டார். அவரைத் தொடர்ந்து நிறையப் பேர் கிறிஸ்துவ மதத்தைத் தழுவினர்.

பவேரியாவில் நற்செய்திப் பணி ஆற்றிவிட்டு ரூபெர்ட், ஜூவாவும் (சார்ல்ஸ்பர்க்) என்ற இடத்திற்குச் சென்றார். அங்கேயும் ஆண்டவர் இயேசுவின் நற்செய்தியை மிகச் சிறப்பான முறையில் அறிவித்து, நிறையப் பேரை இயேசுவுக்குள் கொண்டு வந்தார். இப்படி இடையறாது நற்செய்திப் பணி செய்து வந்த ரூபெர்ட், 710 ஆம் ஆண்டு உயிர்ப்புப் பெருவிழா அன்று இறையடி சேர்ந்தார்.

கற்றுக்கொள்ளவேண்டியப் பாடம்

தூய ரூபெர்ட்டின் நினைவுநாளைக் கொண்டாடும் நாம், அவரிடமிருந்து என்ன பாடத்தைக் கற்றுக் கொள்ளலாம் என்று சிந்தித்துப் பார்த்து நிறைவு செய்வோம்.

நற்செய்தி அறிவிப்பதில் ஆர்வம்

தூய ரூபெர்ட்டின் வாழ்க்கை வரலாற்றை வாசித்துப் பார்க்கும்போது அவரிடமிருந்த நற்செய்தி அறிவிக்கின்ற ஆர்வம்தான் நம்முடைய கவனத்தை ஈர்ப்பதாக இருக்கின்றது. தூய ரூபெர்ட் பல்வேறு இடங்களுக்குச் சென்று ஆண்டவரின் நற்செய்தியை எடுத்துரைத்தார், பலரை ஆண்டவருக்குள் கொண்டு வந்தார். தூய ரூபெர்ட்டின் நினைவுநாளைக் கொண்டாடும் நாம், அவரைப் போன்று நற்செய்தி அறிவிப்பதில் ஆர்வமுள்ளவர்களாக இருக்கின்றோமா? என்று சிந்தித்துப் பார்க்க வேண்டும்.

நற்செய்தியில், ஆண்டவர் இயேசு விண்ணேற்றம் அடைகின்றபோது தம்முடைய சீடர்களைப் பார்த்து சொல்லக்கூடிய வார்த்தை, “உலகெங்கும் சென்று, படைப்பிற்கெல்லாம் நற்செய்தியைப் பறைசாற்றுங்கள்” (மாற் 16: 15) என்பதாகும். ஆம், நாம் ஒவ்வொருவரும் ஆண்டவர் இயேசுவின் நற்செய்தியை உலக மக்களுக்கு அறிவிக்க வேண்டும். அதைதான் அவர் நம்மிடமிருந்து எதிர்பார்க்கின்றார்.

நம்முடைய பாசத்திற்குரிய திருத்தந்தை பிரான்சிஸ் கூட நற்செய்தி அறிவிப்புப் பணிக்கு அதிகமான முக்கியத்துவம் கொடுக்கின்றார். அவர் மூன்று நிலையில் நற்செய்தி அறிவிக்கப்படும் என்று நமக்கு எடுத்துச் சொல்கின்றார். முதல்நிலை, ஏற்கனவே கிறிஸ்தவர்களாக இருப்பவர்களிடம் நற்செய்தியை அறிவித்தல். இது எப்படி என்றால், பலர் கிறிஸ்தவர்களாக இருந்தும் ஏனோ தானோ என்று இருக்கிறார்கள். இவர்களிடத்தில் ஆழமாக நற்செய்தி அறிவிக்கப்பட வேண்டும் என்று திருத்தந்தை சொல்கின்றார். நற்செய்தி அறிவிப்பின் இரண்டாம் நிலை, கிறிஸ்துவை விட்டு விலகி நிற்பவர்களுக்கு நற்செய்தி அறிவித்தல், இன்றைக்கு நிறையப் பேர் இப்படித்தான் வழிபாடுகள், பக்தி முயற்சிகளிலிருந்தும் விலகியே இருக்கின்றார்கள். இப்படிப் பட்டவர்களுக்கு கட்டாயம் நற்செய்தி அறிவிக்கப்படவேண்டும் என்று திருத்தந்தை அவர்கள் எடுத்துரைக்கின்றார்.

நற்செய்தி அறிவிப்பின் மூன்றாம் நிலை, கிறிஸ்துவை அறியாத மக்களுக்கு நற்செய்தி அறிப்பதாகும். இப்படிப்பட்ட ஒரு பணி இன்றைக்கு அதிகமாகத் தேவைப்படுகின்றது. பலர் கிறிஸ்துவை அறியாமல் இருக்கின்றார்கள், இவர்களுக்கு ஆண்டவரின் நற்செய்தியை எடுத்துரைப்பது திருமுழுக்குப் பெற்ற ஒவ்வொருவரின் கடமையாகும். ஆகவே, இந்த மூன்று நிலைகளிலும் நாம் நற்செய்தி அறிவிப்புப் பணியைச் செய்கின்றபோது எல்லாரும் இயேசுவின் நற்செய்திப் பெற்றுக்கொள்வார்கள் என்பதில் எந்தவொரு மாற்றுக் கருத்தும் கிடையாது.

ஒருமுறை மிகச் சிறந்த மறைபோதகரான ராபர்ட் ஜீ. லீயிடம் பத்திரிக்கையாளர் ஒருவர், “உங்களால் மகத்தான முறையில் நற்செய்தி அறிவிப்புப் பணியைச் செய்ய முடிகின்றதே, அது எப்படி?” என்று கேட்டார். அதற்கு அவர் அவரிடம், “நான் இறைமக்களை முழுமையாக அன்பு செய்து, இறைவார்த்தையை எடுத்துரைக்கின்றேன். அதுதான் என்னுடைய வெற்றிக்கான இரகசியம்” என்றார். ஆமாம், இறைமக்களை உண்மையாக அன்பு செய்யும் ஒருவரால்தான் இறைவாக்குப் பணியைச் சிறப்பாகச் செய்ய முடியும். இன்று நாம் நினைவுகூரும் ரூபெர்ட்டும் இறைமக்களை முழுமையாக அன்பு செய்தார். அதனால்தான் அவரால் இறைவாக்குப் பணியைச் சிறப்பாகச் செய்ய முடிந்தது.

ஆகவே, தூய ரூபெர்ட்டின் நினைவு நாளைக் கொண்டாடும் நாம், அவரைப் போன்று ஆண்டவரின் நற்செய்தியை ஆர்வத்தோடு எடுத்துரைப்போம், அதன்வழியாக இறையருள் நிறைவாய் பெறுவோம்.

மறைத்திரு. மரிய அந்தோனிராஜ்
பாளையங்கோட்டை மறைமாவட்டம்